వైసీపీ ఐదేళ్ల పాలనపై అందరితో చర్చించాలని నంద్యాల సభలో సీఎం జగన్ అన్నారు. ఈ ఎన్నికలు ప్రజల భవిష్యత్తును నిర్ణయిస్తాయన్నారు. మోసాల బాబుకు ఇవే చివరి ఎన్నికలు కావాలన్నారు. వైసీపీకి ఓటేస్తే.. మరో ఐదేళ్లు ముందుకు.. బాబుకు ఓటేస్తే పదేళ్లు వెనక్కు ఆంధ్రప్రదేశ్ వెళుతుందన్నారు.
ఐదేళ్లలో వచ్చిన మార్పును గమనించాలని నంద్యాల సభలో సీఎం జగన్ అన్నారు. కుట్రలు, కుతంత్రాలను ఎదుర్కొనేందుకు సిద్ధంగాఉండాలన్నారు. ఈ ఎన్నికలో మనకు జైత్రయాత్ర కావాలన్నారు. జగన్ ను ఎదుర్కొనేందుకు తోడేళ్లు ఏకమయ్యాయన్నారు. ఇతరపార్టీలకు ఓటేసే వారు కూడా ఆలోచించాలన్నారు. లంచాలు, వివక్ష లేని పాలన అందించామన్నారు. పౌర సేవలతోపాటు ప్రజలకు అండగా ఓ మహిళా పోలీస్ ను అందుబాటులో ఉంచామన్నారు. గ్రామ సచివాలయాలు, ఆర్బీకేలు, స్కూల్స్ ను వైసీపీ పాలనలో ఏర్పాటు చేశామన్నారు. ఇవన్నీ చంద్రబాబు ఎందుకు ఏర్పాటు చేయలేకపోయారని నంద్యాల సభలో ప్రశ్నించారు. నాడు నేడు పథకంతో ప్రభుత్వ స్కూళ్లను అన్నీ విధాలుగా 58 నెలల్లోనే అభివృద్ది చేశామన్నారు. ప్రతి ఇంటి తలుపుతట్టి సంక్షేమాన్ని అందించామన్నారు.
